من بغى الفرقا لقى له عذر واسباب ودليل
خل عنك العذر والاسباب دام الحب ضاع
كان ودك بالفراق ابشر عسى عمرك طويل
لاتردد وانت لك كلمه ولك امر.ن.مطاع
لي عليك انك تقول بكلمتن تشفي الغليل
ولك علي اني لاوقف وقفة الرجل الشجاع
لاتجاملني مخافة قال والاخوف قيل
عمر هرج الناس مايسمن ولايغني جياع
كان قصدك سر حبك اوعدك لاصبح بخيل
واحمل اسرارك معي للموت قدر المستطاع
بس قلها قل مااحبك وابشر بصبرن جميل
لاتحسب اني مثل من طبعهم لوي الذراع
صاحبك ماهو كذا ياصاحب القد النحيل
صاحبك طبعه غريب وغربته غربة طباع
بالهوى مانقبل الحل الوسط والا القليل
مثل ماهو لاشرى يشري ولامن باع باع
ثابتن لوهي تميل الارض تحته مايميل
يدري ان الفقر ماهو عيب والدنيا متاع
ماعشق لذة حياته كثر عشق المستحيل
ولاكره حتى مماته كثر كره الانصياع
كم تعلم من شديد البدو وش معنى الرحيل
وكم تعلم من غروب الشمس وش معنى الوداع
وكم تعلم من سحاب الصيف وش معنى الحصيل
وكم تعلم من ليال البرد وش معنى الضياع
ايه انا هذا طريقي موحش وصعب وطويل
وانت لامنك تعبت العالم فجوجه وسااااع
اعتبرني في بداية سكتك عابر سبيل
ورح وانا قلبي معك من وين وجهت الشراع